一向喜愛吃薑汁撞奶, 但總要到甜品店才可吃到, 不太方便! 而且有些店售賣的價錢會有點貴! 心想: 薑+奶, 要多少錢啊?! 最難的算是那一點點的秘技吧!
今次的起個心肝仔, 決定解開撞奶秘技之謎! 好在現今科技通訊發達, 又有很多慷慨的好人, 將秘技和心得在網上分享! 終於.........
首先, 關鍵一, 奶的選擇是很重要的! 唔係隻隻奶都撞得架! 以前曾聽過一定要十字嗰隻, 又話要全脂先得, 究竟所言是否屬實? 究竟邊隻奶最襟撞?
原來很簡單! 只要睇睇鮮奶背面包裝的營養成份表, 襟撞唔襟撞即刻有分曉!
營養成份表通常係每100ml計算的, 只要蛋白質起碼高於4g就ok! 當然越高就越穏陣啦!
今次我用維記綠色包裝的高鈣低脂奶, 蛋白質有4.4g! 高鈣+低脂, 正!
材料好簡單:
- 維記綠色包裝的高鈣低脂奶小盒裝236ml 一盒
- 薑汁 1.5湯匙
- 砂糖適量或因個人口味調節
因為大盒平D, 而且要整二人份, 所以買咗大盒, 自己再量, 但係如果貪方便的妳, 可以直接用一小盒的份量去做)。
做法原來很簡單, 先磨薑汁。 薑去皮洗淨, 用平時磨薑茸的磨磨出薑茸, 然後用手揑出薑汁來, 再隔渣。 有些人會用布把薑茸包着, 然係擠壓出薑汁。將1.5湯匙的薑汁倒進碗內, 備用。
然後, 將鮮奶和糖倒進鍋裏, 一邊攪一邊用慢火煮至冒白煙。 請留意, 關鍵二就在這裏! 原來要視乎奶的温度! 温度要在攝氏80度左右, 不能太滖也不能太凍........ 所以煮至冒白煙就差不多了! 如要精確無誤的話, 請用煮食用的温度計量一量。
跟住就係將煮好的奶倒入另外一個器皿 (第1次), 再倒番入原先的鍋裏(第2次), 如是者總共拉10次, 第11次就撞落預先準備好薑汁的碗裏。 但要記住, 撞之前要先攪拌一下薑汁, 在没有沉澱物時才撞下去! (其實拉呢個過程目的係想降温, 如果有精準的温度計, 相信不用這個步驟。)
就這樣, 讓它靜止三至五分鐘, 凝固後, 好味的薑撞奶就即刻有得食! 看看, 放一隻羮係面都唔會沉下去!
其實有些東東看上去很難, 如果肯花點時間去了解, 去嘗試的話, 你會發覺, 原來就係咁簡單!
My web site: www.biebiewo.com
